السلام عليكم ورحمة الله وبركاتهكنا قد تحدثنا عن اشتياقنا جميعا للبنت المسلمة بكل صفاتها ،، شخصيتها ،، تعاملها
وتكملة لهذه الصفات الجميلة فى البنت المسلمة
سأقوم باستعراض بعض المواقف المضحكة حقا بحياتنا فعذرا إن كان الأسلوب غير العادة فهي حوارات واقعية " للأسف " سنقوم سويا بمراجعتها لنصل في النهاية إلي
" البنت الجميلة المسلمة "
موقف(१)
ايييييييييه يابنت اللي انتي عاملاه ده
ازاي عاوزة تخرجي كده ... يادي الخيبة
عييييييييب عليكي والله
يابنت روحي حطي أحمر ولا أخضر ولا اعملي أي منظر
وايه البهوقة دي
هدوم تيتة ولا هدوم مين دي
عييييييييييييييب هتكسفينا
البسي واتذوقي خليكى تتجوزي
:::::
ومين قااااااااااااال إنها كده بس اللى هتتجوز
ولا مين قال إن اللى مش بيعمل كده يبقى وحش ولا هتعنس
موقف (२)
عيييييييييب يابنت لما تتذوقي في البيت عييييب
أخواتك الصيان يقولوا ايه ... باباكي يشوفك كده ازاي مايصحش
خليكي كده ليل نهار ... اوعي تهتمي بشعرك ولا هدومك
بلاش دلع وكلام فاضي
::::::
هوه الاهتمام الفطري بقى دلع وكلام فاضي ويتعارض مع الموضة
مين قال إن البنت تتمنع عن أساسيتها بسبب المعتقدات الغريبة دى ؟؟
موقف (३)
عييييييييييب يابنت تدعي ربنا يرزقك بعريس كويس يراعي ربنا فيكي
في واحدة في الدنيا تدعي
وتقول يارب اتجوز
لالالالالا مايصحش
انتي متسربعة على ايه يعني ... بلاش قلة حيا وقباحة
ده نصيب
ولما نصيبك يجيلك هتتجوزيه .... بلاش السربعة اللي انتي فيها
بلاش دلع بنااااااااات
:::::
لاتعليق :)
موقف ()
ماما
حمادة بن طنط سوسو زعل مني
ليه ياتوتي ؟؟
عشان امبارح روحت من غير ما أقوله اني ماشية وهو قلق
ماهوه ميصحش بردوا ياتوتي
حمادة في مقام اخوكي وبيخاف عليكي بردوا
عييييب ماتعمليش حساب لكلامه
عيب بعد كده ماتروحيش الا معاه
يلا قومي اتصلي عليه صالحيه
رنا مايجيب زعل بينكم يابنتي
::::::
اتنقطوا زيي مش كده؟؟
بس تخيلوا ده لما يكون بيحصل فعلا
نقول ايه بجد على كده
أنا هسيبكم انتوا تحكموا وتقولوا لي
موقف (५)
ايه يابنت ده
اززاي استاذ محمد يمد ايده يسلم عليكي تقوليله مبسلمش على رجالة
اخصصصصصص عليكي
انا ربيتك على كده
وبعدين فيها ايه يعني
ده زي باباكي لازم تحرجي الراجل
دلع بنااااات
:::::::::
لما يتحرج مرة مش هيكررها تاني
عشان نبطل العادة اللى بقت عادية خالص دى بقى
:)
::::::
ياترى بقى ايه الميزان عندنا ؟؟
ايه اللي يقول
ده عيب وده مش عيب
بقينا بنحكم دلوقتي على أساس اييييييه ؟؟
طبعا دي أمثلة بسيطة
وفي في حياتنا زيها كتييييييييييييير
محتاجين نراجع نفسنا في حاجات كتير
ياريت
يااااريت
ياااااااريت
نرجع لشرع ربنا
ونعرف ايه هوه العيب ؟؟
:)
في انتظار تعليقاتكم ومناقشتكم في هذه المواقف وغيرها في حياتنا
ولو في مواقف شبيهة عند حد فيكم يقولها نتعلم منها ونقاشها
ونعرف ايه هوه العيب
ولنتذكر سويا الجملة القائلة " إذا ربيت ولدا فقد ربيت فردا ،، وإذا ربيت بنتا فقد ربيت أمة "
:::
أحبكم في الله
آخر العنقود
24 التعليقات:
السلام عليكم
بجد بجد ربنا يكرمك يا حبيبتى على الموضوع الشيق والقيم واسلوبك جميل جدا ما شاء الله
غريب فعلا تفكير البنات الايام دى واللى مش هتتزوق مش هتتجوز
واللى ماتصاحبش هتعنس و و و
بجد والله الواحد اللى يفكر يتجوز بيختار بنت ماتعرفش قبله حد وواحده لبسها محترم يكون متاكد ان مفيش حد قبله لمسها ويختار المتدينه
لكن للاسف البنات فاكره العكس او الشيطان بيسولهم كده
بنات المسلمين محتاجين يعرفوا الحقيقه والحلال والحرام ويمشوا على نهج الاسلام هياخدوا سعاده الدنيا والاخره والله
ربنا يهدينا جميعا
وربنا يبارك فيكم على العمل الرائع وفى انتظار الباقى
السلام عليكم ورحمة الله وبركاته
*بجد موضوع رائع وأسلوب عرض أروع بارك الله فى قلمك .
*عندى بعض التعليقات على المواقف :
الموقف الاول: بالنسبة للمكياج والجواز : بسؤال أحد الشباب البعيد عن الإلتزام عن رأيه فى هذا الموضوع قال :هؤلاء البنات اللى أحمر وأخضر واستريتش للخروج والفسح بس أما لما أحب أتجوز هختار بنت محترمة .
الموقف الثانى : لم أفهمه جيدا ولكن لو كان الاهتمام بالمظهر فى البيت فى حدود الطبيعى مقبول أما لبس الضيق والمفتوح فلا يجوز سوى للزوج فقط حتى أمام الاخوة والاب لا يجوز ففى هذه الحالة أتفق مع رأى القائلة"أخواتك الصيان يقولوا ايه ... باباكي يشوفك كده ازاي مايصحش" .
الموقف الثالث : فعلا.... لا تعليق
هو العيب ايه بالظبط عندهم الخروج بتبرج مش عيب لكن هذا هو العيب !!!
الموقف الرابع : فعلا حاجة تنقط
هما الصراصير دول اللى جايبنا ورا
الموقف الخامس : موضوع السلام ده بقى أفة العصر وفعلا الحل الوحيد له هو الإحراج .
*هذه المواقف رغم خطورتها ولكن الوقع ملىء بما هو أكثر من ذلك بكثير .
ومن أعجب المواقف اللى شوفتها وغرائب العصر " بنات بيعاكسوا فى الشباب " لأى درجة تدنى الحياء الذى هو أجمل ما فى المرأة.
ربنا يحفظنا ويهدينا ويهدى كل بنات وشباب المسلمين .. قولى امين
تحية أبداع وتقدير وعذرا على الإطالة
أبو مريمa
نسيت أقول
الصورة اللى فى الرسالة رائعة ومعبرة جدا وفى حقيقتها رسالة لوحدها
الموقف التالت يعني إنه أدعي على ولدي وأكره إللي يقول آمين.
مش كده كل حاجة عندنا عيب عشان المجتمع فرض علنا كده .. لكن في الحقيقة نحن نريد غير ذلك لكن البعض يعتبر أنه من العيب التصريح بذلك.
تحياتي لك يا عسل على المواقف الحلوة دي.
على فكره بكرهه كلمه عيب دى سم
بحس اللى بيقولها حجته ضعيفه قام قايل عيب عشان يبرر رايه هو دون الاخرين معتمد على انه غالبا اكبر من الاخر
وكمان اكتبى بقى عن مسخره وفضيحه الافراح يالهووووووووووى
العروسه طيب نقول ربنا يغفرلها بلاوى بتعمله فى اليوم ده
طيب وقرايبها ايه لازمه علبه المكياج اللى بيحطوها ايه لازم اللبس اللى ادخل بصابونه
اللى يغيظ بقى ترقص الواحده لما تتهدد وفى الاخر تطلع تجرى قال ايه مكسوفه
ياسلام والله
طيب سؤال برضه ماهو ليه من الاول اهه ده بق دلع البنات اللى مش يطاق
السلام عليكم
وربنا يكرمك وحقيقى نقل مفصل للواقع
ورنا يهدى كل بنات المسلمين اللهم امين
السلام عليكم
هههههههههههههههههههههههههههههههههههه
بجد بجد رائع
والحمد لله حجابى هو كل شئ فى حياتى
ومين قال انحنا مش عايشين حياتنا لا بنعيشها لاكن بنعيشها صح ومنغضبش ربنا
بنطحك وبنهزر مع اخواتنا عادى
للأسف بقى دلوقتى الفكرة متخدة غلط
الله يهديهم ويهدينا
السلام عليكم ورحمة الله وبركاته
جزاكِ الله خيراً أختى وربنا يهدى المسلمين ونرجع للأصل شرعنا العظيم .
السلام عليكم ورحمه الله و بركاته
الكلام ده فعلا هو الى بيتقال
و هو ده فعلا الى بوظ و خلا شكل البنت المسلمه مش كويس
لدرجه انك متعرفيش اذا كانت مسلمه ولا لأ
او هي مسلمه زي ما بيقولوا كلمه في البطاقه
خانه الديانه ( علمت جنيها على مسلمه )
ربنا يهدي كل البنات يارب
...
بس موضوع جميل و مفيد جدا
احيكم عليه
السلام عليكم
طرح رائع
جزاكم الله خيرا
لو كل واحد حكم الشرع ما نتضارب فى المعايير والقيم
وفقكم الله
مدونة جميلة ما شاء الله
دي أول زيارة لي فيها و بأمر الله مش أخر زيارة..اللي بيحكمنا دولقتي مع الأسف مش الشرع بل المجتمع ..يعني إنتي تكلمتي في موضوع السلام على الرجال ودي نقطة مهمه جدا ... أنا قبل التزامي مكنتش بحب أبدا أسلم عالرجال لإن السلام ومسك الإيد داه فيه نوع من الحميمية داه البنت الملتزمة أساسا مش بتخلي عريسها يمسك إيدها إلا بعد كتب الكتاب يبقى ازاي أمد إيدي أحطها في إيد راجل غريب أو حتى قريب ولكنه مش محرم ؟ فعلا اللي بيحكمنا في زمنا داه العرف ويارب نرجع لشرع ربنا..تحياتي
للأسف أصبح قوانين العيب عند العرب مقدمه على تعاليم الشريعه الإسلامية
حتى لو كان يوافق الشريعه فهو عيب
يعني نحن عنا عيب البنت تجيب سيرة الجواز قدام النسوان لكن لمابشوفوا وحدة لابسه قصير ومحزق وملزق ماحدا بفتح تمو ولا بحكيلها عيب أبدا
جد مأسآآآآآآآآآآآآآآآآآآة
الله يصلح الحال
طالبة الفردوس
منورة حبيبتى وربنا يكرمك على كلامك الجميل
عندك حق فعلا التفكير ده موجود للاسف
بس اوقات بفكر بان فعلا الحلال بين والحرام بين .. محتاجين بس نسعى لتطبيقه وتنفيذه صح عشان فعلا نسعد دنيا وآخرة
وربنا يهدينا ويهدي كل بنات المسلمين
دمت بكل الود
كلمة حق
جزاكم الله خير اخى ابومريم
بالنسة للموقف الاول
فعندك حق فيه الكلمة دى بنسمعها كتيييير والمشكلة ان البنات بتكون عارفة ده ومع ذلك مفيش نتيجة .. بس اعتقد ان السبب هوه وجود امثالهم من الشباب مممن يرضون بهذا الحال ويطلبونه بكل أسف
الموقف الثاني
لاشك طبعا بان ما اقصده هوه في اطار المعقول والمتاح لكن هناك من يتحجج بعدم الاهتمام البسيط هذا اما فوق ذلك فلاشك انه لايجوز سوى للزوج فقط
الموقف الثالث
اتفقنا على اللاتعليق :)
الموقف الرابع
عندك حق تشبيه دقيق :)
الموقف الخامس
فعلا السلام بقى منن العادات العصرية االاتيكتية :)
وانا ارى ان قمة الاتيكيت الذين يبحثون عنه فى قيمنا وعاداتنا الاسلامية
اما بالنسبة للموقف معاكسة البنات للشباب فمعشر الفتيات براءة من امثالهن صدقا انا اتعجب من الجرأة الزائدة ... هدانا الله واياهم للخير والصواب
جزاكم الله كل الخير لجميل المناقشة وحسن اطرائك
دمت بكل الخير
الشجرة الام
جزاكم الله كل الخير
عند حضرتك حق
اصبح التصريح بذلك هو العيب بعينه
دمت بود وعافية
تيك كير
فعلا هو مبرر للى مش عنده دليل
اما الافراح بقى
فانتى فتحتي فى موضوع كبير :)
واختلاط كبير في المفاهيم مابين انها ليلة العمر ،، يوم واحد مش هيتعوض ،،ووووو
كل ده نفسي نعرف انه مش مبرر ابدا للي بيحصل فيه فعلا
انا شخصيا غير معترضة على مكياج العروسة مثلا او اققاربها لكن اذا كان الفرح غير مختلط
يعنى فى ضمان بان لايراهم رجل مهما كان
تحياتي وتقديري
اسعدنى مرورك الجميل :)
بحب كل الناس
وعليكم السلام ورحمة الله
جزاكم الله خيرا اخى
الواقع ملئ بالمواقف
هدانا الله وجميع بنات وشباب المسلمين
دمت بخير وود
زهرة الاسلام
ايوووووووه برافو عليكى :)
دى الفكرة ان مين قال اننا مش عايشين حياتنا ومش بنخرج ونهزر ونضحك
بنعمل كل ده ويمكن اكتر من اللى فاكر ان الحجاب او الالتزام بيمنع ده
لكن بطريقة صح
ودايما بقول نفسي يكون في حلال مبهر
زي ماللاسف بقى موجود حرام مبهر
الناس بقت تنبهر بكل شئ خارج عن الحلال ظنا بان مفيش حلال مبهر
ربنا يهدينا ويهدي الجميع يارب
اسعدنى مرورك ومتابعتك :)
حياتي نغم
وعليكم السلام ورحمة الله
اللهم آمين
جزاكم الله كل الخير
دمت بخير
المدونة الاسلامية
صح .. نفسي بس يقتنعوا بان كده شكلهم مش كويس وان مفيش حد بيحب اللى بيعملوه ولا اللى بيتقال
ربنا يرزقنا الحياء يارب
جزاكم الله خيرا
المجاهد الصغير
ياريتنا نرجع نحكم بالشرع من تانى فى ادق امور حياتنا
وقتها فعلا كل الاوضاع هتتغير
جزاكم الله خيرا اخيتى لمشاركتك الدائمة :)
دمت بحب وود
كلمات من نور
اولا منورنا فى المدونة وان شاء الله تتكرر
كلامك صحيح
موضوع السلام ده فعلا بقى عادة بس للاسف عادة غير مقبولة وكمان خطأ
ربنا يهدينا ويرزقنا حسن البصيرة
تحياتى وتقديري
دمت بود
شموخ الاسلام
اهلا بيكى اخيتي
للاسف واضح ان هذه العادات بدأت فى الانتشار وسط المسلمين بكل مكان
باختلاف الاسلوب والوسيلة
الله اسأل ان يردنا اليه مردا جميلا
جيتى خيرا غاليتي
مدزنة جميلة ..
أطيب تحياتي
إرسال تعليق